هناك قصيدة بلهجة عامية لأحد السعوديين قالها لما رأى مثل هذه الصور .
ماعاد فينـا معتصـم لا تصيحيـن
ابكي على موتـاك وابكـي علينـا
اطلق شواربنا ضعوف ومساكيـن
مكتوبـه الذّلـه لـنـا قدّريـنـا
بعنا الضّماير واشترتنا الشياطيـن
استعبدتنـا ثـم غـلّـت يديـنـا
رحنا طعام جحوش وش عاد ترجين
حتـى ولـو جعتـي فـلا تاكلينـا
والا دمانا اللـي تغـذي الشراييـن
مسمّـمـه بالـوهـن لاتطلبيـنـا
ومن قال منّا همنا نصـرة الديـن
ردّي كذبـت,, وكلـنـا كذبيـنـا
حنّا ابتلانا الله بمـدح السلاطيـن
الوقت ضرّانـا النّفـاق وضرينـا
وحنـا جعلنـا للتعنصـر مياديـن
والجاهلـيـه عــوّدت تبتديـنـا
وحنا انشغلنـا بالنّيـاق المزاييـن
لو تذرفيـن الدمـع مـا تشغلينـا
وحنا نخاف من اليهـود الملاعيـن
قولـي لغـزه قبلهـا محاصرينـا
وحنا مجرد عالـمٍ حضهـم زيـن
جات المصيبه فيك ماجـات فينـا
وحنا كذا من وعد بلفـور للحيـن
نشجب ونستنكر لـو انّـا رضينـا
والله لنبطي مـا نحـرر فلسطيـن
لكـن خذيهـا كـاش لاتحرجينـا